Ghada Magazine
ما سمعتهم يا سيد من كم سنة وهني صرلهم عم يقولوا شيعة شيعة شيعة؟
طيب ما شفتهم بشي فيديو من ملاعب الفوتبول او المظاهرات او مسيرات الموتورسيلكلات؟
ما خبروك شو عملوا وقالوا برياض الصلح والشهدا والرينغ والصيفي وشوارع بيروت ؟
ما خبروك انه كل ما تلقي خطاب بيتجمعوا عالحرقوص والمشرفية وبيرددوا الشعار وبروحوا على طريق صيدا القديمة وقصقص وبيفوتوا على احياء اغلبيتها مسيحية وسنية وبهيدا الشعار ؟
ما خبروك يا سيد انه بعد كل خطاب تعبوي عم تعمله عمبتزيد هالحركات بشكل متطرد؟
وما خبروك يا سيد انه في لائحة بالجنوب جابت ٣١٠٠٠ صوت بمصروف اقل من دولار واحد مقابل الصوت يعني اقل من ما صرفت “نحمي ونبني بضيعة وحدة حق بنزين بس؟
وما خبروك انه محمد رعد هدد الناس وبعدا عمليات الفرز ما خلصت؟
وما خبروك انه في محلات نضرب فيها المندوبين وتغيرت فيها اوراق صناديق؟
وما خبروك انه لوائحك تحالفت ودعمت وانتجت ٣ نواب وزراء كهرباء سابقين ببلد مقطوعة فيه الكهربا واساس الدين العام ونائب وزير مالية سابق افلس البلد بولايته ونائب مشهور بفساده كوزير اشغال وزراعة وبعدة مناصب اخرى؟ طيب ما خبروك يا سيد انه كان على لوائحك مروان خيرالدين احد اهم المسؤولين عن سرقة اموال الناس؟
وكمان ما خبروك انه القانون اللي عم تنتقده وغير عادل مرق على نوابك ووزرائك ونعمل بالتحديد لتامين مقعد لحليفكم ؟ بعد في كتير اشيا واشيا سماحتك ….
سماحة السيد، ان كنت تدري فتلك مصيبة وان كنت لا تدري فالمصيبة اعظم؟
علي المقداد