كنا صغار…..

كنا صغار وكلنا رسمنا الشمس ع طرف الورقة .. ورسمنا امرأة بتشبه ( ماما) ورجل بيشبه ( بابا) .. كلنا رسمنا جسم الرجل بشكل مستطيل وراسو مدور وشعرات البنت منكوشين.. كنا دايما نرسم بيوت سطحا قرميد ..والطيور والعصافير تعبي ورقتنا .. من وقت ما كبرنا وصرنا نعرف نرسم الاشكال، تغيرت الدني.. كانت جملة ( الله يراني ) ع ورقة الفروض تعنينا كتير ، ونصير نتخايل انو ربنا شايفنا ، ولازم نحسن خطنا لانو شايفنا .. كانت الاشيا البسيطة سر سعادتنا، شو كنا نفرح وقت تكلفنا المعلمة نروح ع غرفة المعلمين نجيب الدفاتر .. او نجيب طبشور ملون .. او نمحي اللوح .. شو كانت فرحتي وقت تقلي قوم شوف مين بيحكي .. وكنا نكتب اسم التلميذ الثرثار ، واذا زاد من شيطنتو نحط حد اسمو XX ..كانت أحلامنا صغيرة على حجم ورقتنا ودفترنا .. كنا صغار وكانت متعتنا وقت كانو أهلنا يحكولنا حكايات ، ونحنا مكومين حدن شي متل علامة الاستفهام ؟، وشي متل علامة التعجب ! ونسرح بخيالنا .. وكتير منا يغفى وما يكمل سماع الحكاية .. وبس كبرنا اعترف (ابونا) انو اكتر حكايتو كان يخترعا من عقلو تيسكتنا وما نعود نتشيطن.. شو كنا نفرح بس نغفى ويخلونا نايمين ببيت جدنا .. وكتير منا لبس بيجامة من عند (ستو) ، طلع فيا متل المحكوم بالاعدام .. كانت الاشيا بسيطة وحلوة ، متل الدفتر يللي نلزق عليه الصور ، و(الاتوغراف) يللي نشتري قبل ما تخلص المدرسة تيكتبوا رفقاتنا ذكرياتهم وتنمياتهم .. وقصص الشياطين الاربعة ، وسوبرمان والوطواط ، وطرزان، و(اليوم التلفزيوني الطويل) وقت كان تلفزيون لبنان يعملو ايام عيد الاستقلال وما نصدق انو التلفزيون الاسود والابيض رح يفتح من الصبح لليل.. كل الاشيا تغيرت بس كبرنا ، يمكن كبرت عقولنا ؟ صح، بس صغرت برائتنا وعفويتنا … واجمل ما في الطفولة انو بتشوف فيها الاشيا حلوة وبيضا .. صحيح متل ما غنت فيروز ( لو فينا نهرب ونطير مع هالورق الطاير تنكبر بعد بكير شو صاير شو صاير …) انها غريزة البقاء .

#صبحي_منذر_ياغي