عم يقولوا… أمال البيروتي طربيه

عم يقولوا :

*نحنا عم نعاني الضيق شو عا بالن يللي سافروا!!

*جاوبتن*!*

…هالجملة سمعناها كتير ،

وولادنا المسافرين سمعوها كتير ….رايحين والدمع بعيونن …

عالمطار صبية مسافرة متل ما ولادنا راحوا حتى “يأمنوا مستقبلهم” …يللي انسرق بلبنان…

كمان هالصبية بتسمع هالجملة من أحد موظفي المطار هيي وعم تختم جواز السفر :

*إنتو شو عا بالكم رايحين ومرتاحين بس نحنا يللي عم نعاني الضيق*…

وكان جوابها :

نحنا يللي رايحين ، وتاركين قلبنا بلبنان …❤️

عا بالنا نضل هون لو كان فينا نضل ونلاقي وظايف برواتب تغطي مصاريف العيلة …

بالغربة ، لا منروح ومنجرف المال بالرفش ولا منقطفو من الشجر …

الغربة وجع وتعب ومعاناة ..

الغربة وحدة ولو كنت بالعجقة

الغربة برد ولو كانت الحرارة عالية

الغربة مرض ولو كانت الأدوية والمستشفيات مأمنة..

الغربة جوع ولو كانت المطاعم مليانة …

لأن بالغربة ما في أهل ولا في جيران ولا الأصحاب ولا في وطن…

فهمت هلق مين يللي بيعاني؟؟؟

بلبنان في العيلة والألفة والعونة وبعطيكي من شو زرعت وبتعطيني من أرضك…

بلبنان في الضيعة والخبز والموقدة والمونة وجمعة الجيران عا صبحية مناقيش أو غيره ..

بلبنان في الطبيعة والمشوار بين البحر والجبل، في وقفة بكل منطقة لأن في المحبين وكلمة *حولوا اشتقنالكن ، وخليكن عنا* *والله يبارك*..

بلبنان في عاداتنا يللي ما قتلتها الحضارة المزيفة، ولو ضيقت عليها…

بلبنان في السند وقت الضيق ، ووقت الفرح …

كل جمعة بتلم الأحبة بتسوا كنوز الأرض…

صح نحن رايحين نشتغل بالغربة بس قلبنا وعيونا عا لبنان لأن

*ما في متل لبنان*….

ما تحسدونا وما تفكرونا مبسوطين أكتر منكن….

*نيالكن لأنكن بلبنان*